मुंबई | प्रतिनिधी प्रीती गडा
खार (पूर्व) येथील स्टेशन ब्रिज ते साईबाबा रोड नाका आणि पुढे गोलिबार रोडपर्यंतच्या वॉर्ड क्रमांक ९४ मध्ये स्वच्छतेचा प्रश्न गंभीर बनला असून, दुपारच्या सत्रातील सफाई कामगारांच्या निष्काळजीपणामुळे परिसरात अस्वच्छतेचे साम्राज्य पसरले आहे. रस्त्यावर कचऱ्याचे ढीग, अर्धवट साफसफाई आणि वेळेआधी काम सोडून जाण्याच्या प्रकारांमुळे नागरिकांमध्ये तीव्र नाराजी व्यक्त होत आहे.
स्थानिकांच्या मते, सकाळच्या तुलनेत दुपारच्या सत्रात स्वच्छता कामे पूर्णपणे कोलमडलेली दिसतात. अनेक ठिकाणी कचरा तसाच पडून राहत असल्याने दुर्गंधी वाढत असून, डासांची पैदास होऊन आरोग्याचा प्रश्न गंभीर झाला आहे. विशेषतः स्टेशन परिसरासारख्या गर्दीच्या ठिकाणी दुपारनंतर कचऱ्याचे प्रमाण वाढल्याने प्रवासी आणि रहिवाशांना मोठा त्रास सहन करावा लागत आहे.
साईबाबा रोड नाका आणि गोलिबार रोड परिसर हा दाट लोकवस्तीचा भाग असल्याने येथे नियमित व प्रभावी स्वच्छता अत्यावश्यक आहे. मात्र, संबंधित ठेकेदाराचे कामगार वेळेचे पालन करत नसल्याने आणि काही वेळा कामच न करता निघून जात असल्याने परिस्थिती दिवसेंदिवस बिकट होत आहे. याकडे संबंधित अधिकाऱ्यांचेही दुर्लक्ष होत असल्याचा आरोप नागरिकांकडून केला जात आहे.
“करदात्यांचे पैसे देऊनही मूलभूत सुविधा मिळत नसतील, तर ही गंभीर बाब आहे. प्रशासनाने तत्काळ चौकशी करून दोषींवर कठोर कारवाई करावी,” अशी मागणी स्थानिक रहिवाशांनी केली आहे.
नागरिकांनी वारंवार तक्रारी करूनही कोणतीही ठोस कारवाई न झाल्याने संताप उफाळून आला आहे. संबंधित ठेकेदारावर दंडात्मक कारवाई करावी किंवा त्याचा करार रद्द करावा, अशी मागणी जोर धरत आहे.
दरम्यान, महानगरपालिकेने या प्रकरणाची तात्काळ दखल घेऊन चौकशी सुरू करावी, नियमित स्वच्छता व्यवस्था काटेकोरपणे राबवावी आणि जबाबदार अधिकाऱ्यांवरही कारवाई करावी, अशी मागणी नागरिकांकडून होत आहे.
कारवाई होणार की फक्त आश्वासने?
या पार्श्वभूमीवर आता सर्वांचे लक्ष प्रशासनाच्या पुढील भूमिकेकडे लागले असून, नागरिकांना केवळ आश्वासन नव्हे तर प्रत्यक्ष कृतीची अपेक्षा आहे. अन्यथा स्थानिकांकडून तीव्र आंदोलन छेडण्याचा इशाराही देण्यात आला आहे.