अपघातात निष्पाप व्यक्तीला जीव गमवावा लागल्यानंतरही रस्त्यावरील खड्डे कायम; पालघरकरांचा संतप्त सवाल, संबंधित विभागाने तातडीने दखल घेण्याची मागणी
पालघर | विशेष प्रतिनिधी
पालघर नगरपरिषद हद्दीतील चार रस्त्यावर काही दिवसांपूर्वी झालेल्या भीषण अपघातात एका निष्पाप व्यक्तीला आपला जीव गमवावा लागल्याची दुर्दैवी घटना घडली होती. या घटनेनंतर तरी संबंधित प्रशासनाला जाग येईल आणि रस्त्यावरील धोकादायक खड्डे तातडीने बुजवले जातील, अशी अपेक्षा नागरिकांना होती. मात्र, अपघात होऊनही आजपर्यंत या रस्त्यावरील खड्डे जैसे थे असल्याने नगरपरिषद आणि सार्वजनिक बांधकाम विभागाच्या (PWD) कार्यक्षमतेवर गंभीर प्रश्नचिन्ह उपस्थित होत आहे.
एखाद्या निष्पाप व्यक्तीचा जीव गेल्यानंतरही प्रशासनाला रस्त्यावरील खड्डे बुजवण्याची गरज वाटत नसेल, तर आणखी किती अपघात झाल्यानंतर संबंधित विभागाला जाग येणार? आणखी एखाद्या निष्पाप व्यक्तीचा बळी गेल्यानंतरच खड्डे बुजवले जाणार आहेत का? असा संतप्त सवाल स्थानिक नागरिकांकडून उपस्थित केला जात आहे.
या रस्त्याची जबाबदारी नेमकी पालघर नगरपरिषदेची आहे की सार्वजनिक बांधकाम विभागाची, याबाबत नागरिकांमध्ये संभ्रम आहे. मात्र, जबाबदारी एकमेकांवर ढकलण्यापेक्षा संबंधित विभागाने समन्वय साधून तातडीने रस्त्यावरील खड्डे बुजवणे आवश्यक आहे. नागरिकांच्या जीवाशी संबंधित असलेल्या या गंभीर प्रश्नाकडे प्रशासन इतके दुर्लक्ष कसे करू शकते, असा प्रश्नही उपस्थित होत आहे.
रस्त्यावरील खड्ड्यांमुळे वाहनचालकांना जीव मुठीत धरून प्रवास करावा लागत आहे. विशेषतः दुचाकीस्वारांसाठी हे खड्डे अपघाताला निमंत्रण देणारे ठरत आहेत. आधीच एका निष्पाप व्यक्तीला जीव गमवावा लागला असताना प्रशासन आणखी एखाद्या दुर्घटनेची वाट पाहत आहे का, असा संतप्त सवाल नागरिक करत आहेत.
प्रशासनाने आता तरी झोपेतून जागे व्हावे! संबंधित नगरपरिषद किंवा सार्वजनिक बांधकाम विभागाने तातडीने घटनास्थळाची पाहणी करून रस्त्यावरील सर्व खड्डे बुजवावेत आणि भविष्यात अशा दुर्घटना घडू नयेत यासाठी कायमस्वरूपी उपाययोजना कराव्यात, अशी जोरदार मागणी नागरिकांकडून होत आहे. आणखी एखाद्या निष्पाप जीवाचा बळी गेल्यानंतर प्रशासनाला जाग येण्यापेक्षा वेळीच कार्यवाही करणे अधिक महत्त्वाचे आहे.
