४ व ५ नोव्हेंबरदरम्यान १७ वर्षांखालील मुले-मुलींच्या मैदानी स्पर्धा; आंतरराष्ट्रीय खेळाडू व राष्ट्रीय विक्रमवीर हर्ष पाटील मुख्य आकर्षण
पालघर | विशेष प्रतिनिधी
राज्यभरातील युवा खेळाडूंच्या क्रीडाकौशल्याचा, वेगाचा आणि जिद्दीचा थरार अनुभवण्याची संधी पालघर जिल्ह्यातील क्रीडाप्रेमींना मिळणार आहे. बोईसर येथील तारापूर अणुऊर्जा कर्मचारी वसाहतीतील कॉर्लिनी मैदानावर ४ व ५ नोव्हेंबर २०२६ रोजी १७ वर्षांखालील मुले व मुलींच्या शालेय राज्यस्तरीय मैदानी स्पर्धांचे आयोजन करण्यात आले आहे. या स्पर्धेत महाराष्ट्रातील विविध जिल्ह्यांतील गुणवंत खेळाडू सहभागी होणार असून, आंतरराष्ट्रीय स्तरावर देशाचे प्रतिनिधित्व केलेला आणि राष्ट्रीय विक्रमवीर म्हणून ओळख असलेला हर्ष पाटील हे या स्पर्धेचे प्रमुख आकर्षण ठरणार आहेत.
या दोन दिवसीय क्रीडा महोत्सवात धावण्याच्या शर्यतींसह विविध मैदानी क्रीडाप्रकारांमध्ये खेळाडूंना आपले कौशल्य सिद्ध करण्याची संधी मिळणार आहे. राज्याच्या विविध भागांतून आलेले युवा खेळाडू पदकांसाठी आणि सर्वोत्तम कामगिरीसाठी मैदानात उतरणार असल्याने स्पर्धांमध्ये चुरस पाहायला मिळणार आहे. विशेष म्हणजे, या स्पर्धेतील खेळाडूंच्या कामगिरीच्या आधारे आगामी राष्ट्रीय शालेय स्पर्धेसाठी महाराष्ट्राचा संघ निवडण्यात येणार आहे. त्यामुळे प्रत्येक खेळाडूसाठी ही स्पर्धा राष्ट्रीय स्तरावर पोहोचण्याची महत्त्वपूर्ण संधी ठरणार आहे.
राष्ट्रीय विक्रमवीर हर्ष पाटीलच्या कामगिरीकडे लक्ष
या स्पर्धेचे विशेष आकर्षण म्हणजे आंतरराष्ट्रीय स्तरावर देशाचे प्रतिनिधित्व केलेला आणि राष्ट्रीय विक्रमाची नोंद असलेला हर्ष पाटील! ११० मीटर अडथळा शर्यतीतील आपल्या वेगवान कामगिरीसाठी ओळखल्या जाणाऱ्या हर्षच्या उपस्थितीमुळे स्पर्धेची उत्सुकता अधिकच वाढली आहे. त्याचा वेग, अडथळ्यांवर मात करण्याचे कौशल्य आणि मैदानावरील आत्मविश्वास प्रत्यक्ष पाहण्याची संधी युवा खेळाडूंसह क्रीडाप्रेमींना मिळणार आहे.
कमी वयात आंतरराष्ट्रीय स्तरावर मजल मारणाऱ्या हर्ष पाटीलची उपस्थिती राज्यभरातून सहभागी होणाऱ्या नवोदित खेळाडूंसाठी प्रेरणादायी ठरणार आहे. मेहनत, सातत्य आणि जिद्दीच्या जोरावर क्रीडा क्षेत्रात मोठी कामगिरी करता येते, हा संदेशही त्याच्या सहभागातून मिळणार आहे.
‘वेगवान धावपटू’ आणि ‘सर्वोत्कृष्ट खेळाडू’ पुरस्कारांचे आकर्षण
या राज्यस्तरीय स्पर्धेत उत्कृष्ट कामगिरी करणाऱ्या खेळाडूंना प्रोत्साहन देण्यासाठी ‘वेगवान धावपटू’ आणि ‘सर्वोत्कृष्ट खेळाडू’ असे विशेष पुरस्कार प्रदान करण्यात येणार आहेत. त्यामुळे वैयक्तिक कामगिरी उंचावण्यासाठी खेळाडूंमध्ये अधिक चुरस निर्माण होण्याची अपेक्षा आहे.
बोईसरच्या TAPS कॉर्लिनी मैदानावर रंगणारा हा राज्यस्तरीय क्रीडा महोत्सव पालघर जिल्ह्यासाठी अभिमानाची बाब ठरणार आहे. राज्यातील उदयोन्मुख खेळाडूंना आपली गुणवत्ता सिद्ध करण्यासाठी हक्काचे व्यासपीठ मिळण्याबरोबरच राष्ट्रीय स्तरावर महाराष्ट्राचे प्रतिनिधित्व करणारे नवे खेळाडू घडविण्याच्या दृष्टीने ही स्पर्धा महत्त्वपूर्ण ठरणार आहे.
एकीकडे राष्ट्रीय संघात स्थान मिळविण्यासाठी युवा खेळाडूंची धडपड, तर दुसरीकडे राष्ट्रीय विक्रमवीर हर्ष पाटीलच्या कामगिरीची उत्सुकता, अशा दुहेरी आकर्षणामुळे ४ व ५ नोव्हेंबर रोजी बोईसरच्या कॉर्लिनी मैदानावर मैदानी स्पर्धांचा रोमांचक थरार अनुभवायला मिळणार आहे.
