पालघर (विशेष प्रतिनिधी):
रस्ते अपघातांचे प्रमाण कमी करण्यासाठी आणि लहान वयापासूनच विद्यार्थ्यांमध्ये शिस्त व रस्ते सुरक्षेबाबत जागरूकता निर्माण करण्याच्या उद्देशाने, वसा येथील सुनील कोम अनुदानित माध्यमिक आश्रमशाळेत ‘रस्ते सुरक्षा आणि जागरूकता’ विषयावर विशेष मार्गदर्शनपर कार्यक्रमाचे आयोजन करण्यात आले होते. ‘सेवा संकल्प अभियाना’अंतर्गत पार पडलेल्या या उपक्रमात पालघर पोलीस दलाच्या वाहतूक नियंत्रण विभागाने विद्यार्थ्यांना सुरक्षेचे मोलाचे धडे दिले.
ठाणे विभागाचे अपर आयुक्त गोपीचंद कदम आणि डहाणू एकात्मिक आदिवासी विकास प्रकल्पाच्या प्रकल्प अधिकारी तथा सहाय्यक जिल्हाधिकारी अनन्या रेड्डी यांच्या मार्गदर्शनाखाली आदिवासी विकास विभागामार्फत १७ सप्टेंबर ते १७ ऑक्टोबर २०२६ या कालावधीत राज्यभरात ‘सेवा संकल्प अभियान’ राबविण्यात येत आहे. या अभियानांतर्गत वृक्षारोपण, स्वच्छता अभियान, विद्यार्थ्यांची आरोग्य तपासणी आणि पालक जनजागृती यांसारख्या विविध सामाजिक उपक्रमांसोबतच विद्यार्थ्यांच्या सुरक्षेला प्राधान्य देत या रस्ते सुरक्षा उपक्रमाचे आयोजन करण्यात आले.
अल्पवयीन वाहनचालक आणि पालकांच्या जबाबदारीवर भर
कार्यक्रमात पालघर पोलीस दलाच्या वाहतूक नियंत्रण विभागाचे अधिकारी शंकर सांगळे आणि श्री. पवार यांनी विद्यार्थ्यांना मार्गदर्शन केले. रस्ता ओलांडताना घ्यावयाची काळजी, वाहतूक चिन्हांचे पालन, सुरक्षित प्रवासाचे महत्त्व आणि अपघात टाळण्यासाठी आवश्यक खबरदारीबाबत त्यांनी प्रात्यक्षिकांसह सविस्तर माहिती दिली.
विशेषतः अल्पवयीन मुलांकडून होणारे वाहतूक नियमांचे उल्लंघन, विनापरवाना वाहन चालवण्याचे धोके आणि यामध्ये पालकांची असणारी जबाबदारी यांसारख्या गंभीर विषयांवर यावेळी मार्गदर्शन करण्यात आले. “वाहतुकीचे नियम पाळणे ही केवळ दंडाच्या भीतीपोटी करण्याची गोष्ट नसून, स्वतःचे व इतरांचे जीवन सुरक्षित ठेवणे हे प्रत्येक नागरिकाचे सामाजिक कर्तव्य आहे,” असा महत्त्वाचा संदेश पोलीस अधिकाऱ्यांनी विद्यार्थ्यांना दिला.
विद्यार्थ्यांचा उत्स्फूर्त प्रतिसाद
या कार्यक्रमास शाळेचे मुख्याध्यापक सोपान होन, शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते. वाहतूक पोलिसांनी दिलेल्या प्रात्यक्षिक व मार्गदर्शनाला विद्यार्थ्यांनी उत्स्फूर्त प्रतिसाद दिला.
’सेवा संकल्प अभियाना’च्या माध्यमातून शिक्षणासोबतच विद्यार्थ्यांच्या सुरक्षिततेला, सामाजिक जाणीवांना आणि जबाबदार नागरिकत्वाच्या भावनेला चालना देण्याचा प्रशासनाचा हा उपक्रम कौतुकास्पद ठरत आहे.