पालघर : विशेष प्रतिनिधी
पालघर पूर्व परिसरात वाघ फिरत असल्याच्या किंवा वाघ दिसल्याच्या बातम्या व संदेश सोशल मीडियावर प्रसारित होत असल्याच्या पार्श्वभूमीवर पालघर पोलिसांनी नागरिकांना सतर्क राहण्याचे आवाहन केले आहे. काही व्यक्ती कृत्रिम बुद्धिमत्तेचा (AI) वापर करून वाघाचे बनावट फोटो तयार करत असल्याने नागरिकांनी अशा अफवांवर विश्वास ठेवू नये, असे पोलिसांनी स्पष्ट केले आहे.
सध्या सोशल मीडियाच्या माध्यमातून कोणतीही माहिती क्षणार्धात मोठ्या प्रमाणावर पसरते. मात्र, माहितीची सत्यता न तपासता ती पुढे पाठवल्यास नागरिकांमध्ये भीती आणि संभ्रमाचे वातावरण निर्माण होऊ शकते. त्यामुळे वाघ दिसल्याबाबत कोणताही संदेश, फोटो किंवा व्हिडिओ प्राप्त झाल्यास त्याची खातरजमा केल्याशिवाय तो इतरांना पाठवू नये, असे आवाहन पोलिसांनी केले आहे.
अफवांमुळे घबराट निर्माण करू नका!
वाघ दिसल्याचे सांगणारे बनावट फोटो किंवा दिशाभूल करणारे संदेश प्रसारित केल्यामुळे नागरिकांमध्ये अनावश्यक भीती निर्माण होऊ शकते. त्यामुळे नागरिकांनी सोशल मीडियावरील प्रत्येक माहितीवर आंधळेपणाने विश्वास न ठेवता अधिकृत यंत्रणांकडून माहितीची खात्री करावी. तसेच, कोणतीही अप्रमाणित माहिती फॉरवर्ड करणे किंवा खोटे फोटो शेअर करणे टाळावे.
नागरिकांनी काय काळजी घ्यावी?
वाघ दिसल्याबाबतच्या अफवा पसरवू नयेत.
कोणताही संदेश किंवा फोटो शेअर करण्यापूर्वी त्याची सत्यता तपासावी.
बनावट किंवा AI च्या मदतीने तयार केलेले फोटो प्रसारित करू नयेत.
परिसरात वन्यप्राणी दिसल्यास स्वतःहून निष्कर्ष काढण्याऐवजी संबंधित अधिकृत यंत्रणांना कळवावे.
अफवांमुळे घाबरून न जाता शांतता राखावी आणि प्रशासनाला सहकार्य करावे.
अफवा पसरवणे हा गंभीर प्रकार!
खोटी माहिती पसरवून नागरिकांमध्ये भीती निर्माण करणे टाळले पाहिजे. नागरिकांनी जबाबदारीने सोशल मीडियाचा वापर करावा आणि कोणतीही माहिती प्रसारित करण्यापूर्वी तिची सत्यता पडताळावी, असे आवाहन पालघर पोलिसांनी केले आहे.
“अफवा पसरवू नका, फॉरवर्ड करू नका; अधिकृत माहितीची खात्री करा,” हा संदेश देत पालघर पोलिसांनी नागरिकांना सतर्क राहण्याचे आवाहन केले आहे.
सजग नागरिक, सुरक्षित पालघर!
