एमआयडीसी बोईसर-तारापूर औद्योगिक वसाहतीतील आरती ड्रग्स लि. (प्लॉट क्र. T-150, शिवाजीनगर जवळ) येथे सोमवारी सकाळी झालेल्या भीषण वायूगळतीमुळे परिसरात घबराटीचे वातावरण निर्माण झाले. कंपनीतील डायल्यूट HCl (हायड्रोक्लोरिक आम्ल) टाकीला भेग पडल्याने मोठ्या प्रमाणात आम्लगळती झाली. त्यातून निर्माण झालेल्या दाट वायूमुळे शिवाजीनगर व सालवड परिसरातील नागरिकांना डोळे व घशात जळजळ होण्याचा त्रास झाला.
🚨 घटना कशी घडली?
आरती ड्रग्स लि. या कंपनीच्या रासायनिक साठवण टाकीला अचानक भेग पडल्याने डायल्यूट HCl बाहेर पडले. या आम्लामुळे हवेत विषारी वायू मिसळून परिसरात पसरला. काही काळासाठी परिसरात धुरकट वातावरण तयार झाले होते.
👨👩👦 नागरिक त्रस्त – आरोग्याला धोका
शिवाजीनगर व सालवड भागातील अनेक नागरिकांनी डोळे व घशात जळजळ, श्वास घेताना त्रास अशा तक्रारी केल्या. काही कामगार व परिसरातील रहिवाशांना तातडीने प्राथमिक उपचार देण्यात आले.
📍 घटनास्थळी धाव
घटनेनंतर नागरिकांमध्ये भीतीचे वातावरण निर्माण झाले. रागावलेल्या नागरिकांनी मोठ्या संख्येने कंपनीच्या प्रवेशद्वारावर गर्दी केली. काही वेळातच हजारो नागरिक जमून कंपनीविरोधात घोषणाबाजी करत तीव्र आक्रोश व्यक्त केला.
दरम्यान, परिस्थिती नियंत्रणात आणण्यासाठी एमपीसीबी (महाराष्ट्र प्रदूषण नियंत्रण मंडळ) अधिकारी, पोलिस अधिकारी व एमआयडीसी प्रशासन घटनास्थळी दाखल झाले असून तपास सुरु आहे.
🗣️ नागरिकांचा आक्रोश
“दर काही दिवसांनी एमआयडीसी परिसरात रसायनगळतीची घटना घडते. उद्योग कंपन्यांकडून सुरक्षा नियमांचे पालन केले जात नाही. यामुळे आजूबाजूच्या नागरिकांचे आरोग्य धोक्यात येत आहे. याबाबत कडक कारवाई व्हावी,” अशी मागणी नागरिकांनी केली आहे.
⚠️ परिस्थिती नियंत्रणात
सध्या आम्लगळती आटोक्यात आल्याचे प्रशासनाने सांगितले असून हवा शुद्ध करण्यासाठी उपाययोजना करण्यात येत आहेत. तरीही परिसरातील नागरिकांमध्ये भीतीचे सावट कायम आहे.