पालघर :
पालघर नगरपरिषद निवडणुकीत जनतेने स्पष्ट कौल दिल्यानंतरही पराभूत उमेदवारांचे काही प्रतिनिधी अद्याप निकाल स्वीकारण्यास तयार नसल्याचे चित्र दिसत आहे. या प्रतिनिधींमार्फत पालघर नगरपरिषद हद्दीतील सुरू असलेल्या तसेच प्रस्तावित विकासकामांमध्ये जाणीवपूर्वक अडथळे निर्माण केले जात असल्याचे आरोप पुढे येत आहेत.
नगरपरिषद प्रशासनाकडून रस्ते दुरुस्ती, पाणीपुरवठा, गटार व्यवस्था, स्वच्छता तसेच मूलभूत नागरी सुविधा सुधारण्यासाठी विविध कामे हाती घेण्यात आली आहेत. मात्र, काही ठिकाणी स्थानिक पातळीवर गैरसमज पसरवणे, कामगारांना अडवणे, ठेकेदारांवर दबाव टाकणे तसेच प्रशासनाविरोधात चुकीची माहिती पसरवून कामे थांबवण्याचा प्रयत्न केला जात असल्याचे समोर आले आहे.
स्थानिक नागरिकांमध्ये यामुळे तीव्र नाराजी व्यक्त होत असून, “निवडणूक हरल्यानंतरही राजकीय सूडबुद्धीने विकासकामे रोखणे हे पालघरच्या प्रगतीसाठी घातक आहे,” अशी प्रतिक्रिया नागरिकांकडून दिली जात आहे. जनतेच्या कराच्या पैशातून होणारी कामे थांबवली जात असल्याने याचा थेट फटका सामान्य नागरिकांना बसत आहे.
दरम्यान, शहराच्या सर्वांगीण विकासासाठी राजकीय मतभेद बाजूला ठेवून सहकार्य करण्याची गरज असल्याचे मत सुज्ञ नागरिकांकडून व्यक्त होत आहे. पालघरच्या विकासाला अडथळा न आणता जनहिताला प्राधान्य द्यावे, अशी मागणी जोर धरत आहे.