पालघर : शहरातील जय अंबे गॅस एजन्सी येथे गॅस सिलेंडर मिळण्यात होत असलेल्या विलंबामुळे नागरिकांना मोठ्या अडचणींचा सामना करावा लागत आहे. अनेक दिवसांपासून बुकिंग करूनही सिलेंडर वेळेत मिळत नसल्याच्या तक्रारी वाढत असून, यामुळे सर्वसामान्य नागरिक त्रस्त झाले आहेत.
स्थानिक नागरिकांच्या मते, वारंवार एजन्सीला संपर्क साधूनही योग्य प्रतिसाद मिळत नाही. काही ठिकाणी तर ग्राहकांना दिवसन्दिवस वाट पाहावी लागत असल्याचे समोर आले आहे. घरगुती कामकाज पूर्णपणे गॅसवर अवलंबून असताना हा तुटवडा नागरिकांच्या दैनंदिन जीवनावर गंभीर परिणाम करत आहे.
या पार्श्वभूमीवर नागरिकांनी प्रशासनाकडे तातडीने हस्तक्षेप करण्याची मागणी केली आहे. “सिलेंडर वेळेत मिळत नसल्यामुळे महिलांना व ज्येष्ठ नागरिकांना सर्वाधिक त्रास सहन करावा लागत आहे. प्रशासनाने याकडे गांभीर्याने पाहून संबंधित एजन्सीवर तात्काळ कारवाई करावी,” अशी मागणी नागरिकांनी केली आहे.
दरम्यान, संबंधित अधिकाऱ्यांनी या प्रकरणाची चौकशी करून पुरवठा सुरळीत करण्यासाठी त्वरित उपाययोजना कराव्यात, अन्यथा नागरिकांकडून तीव्र आंदोलन छेडण्याचा इशाराही देण्यात आला आहे.
प्रशासन झोपेत? नागरिकांचा सवाल
सतत तक्रारी करूनही परिस्थितीत सुधारणा न झाल्याने प्रशासनाच्या कार्यक्षमतेवर प्रश्नचिन्ह उपस्थित होत आहे. नागरिकांनी स्पष्ट शब्दांत सांगितले की, “आम्हाला आश्वासन नको, तर तातडीने गॅस सिलेंडर हवा.”
आता प्रशासन यावर किती लवकर आणि ठोस कारवाई करते, याकडे सर्वांचे लक्ष लागले आहे.