मुंबई | विशेष प्रतिनिधी
खार पूर्व येथील निर्मलनगर पोलीस ठाण्याच्या हद्दीत गुटखा, सुगंधित तंबाखू आणि अन्य प्रतिबंधित पदार्थांची खुलेआम विक्री होत असल्याच्या आरोपांमुळे परिसरात संतापाची लाट उसळली आहे. राज्यात गुटखाबंदी लागू असतानाही अनेक पानटपऱ्या रस्त्यावरील छोटे दुकान व्यावसायिक आस्थापनांमधून रात्री उशिरापर्यंत हा अवैध व्यवसाय सुरू असल्याचे स्थानिक नागरिकांचे म्हणणे आहे.
नागरिकांच्या आरोपानुसार, निर्मलनगर परिसरातील अनेक ठिकाणी बंदी असलेला गुटखा सहज उपलब्ध होत असून काही विक्रेते ग्राहकांना मागणीनुसार गुप्तपणे माल पुरवत आहेत. विशेष म्हणजे, हा प्रकार उघडपणे सुरू असतानाही संबंधित यंत्रणांकडून प्रभावी कारवाई होत नसल्याने प्रशासनाच्या कार्यक्षमतेवर प्रश्न उपस्थित होत आहेत.
कायद्याला हरताळ, कारवाईला टाळाटाळ?
गुटखा विक्रीवर स्पष्ट बंदी असतानाही अवैध विक्री सुरू राहणे ही गंभीर बाब मानली जात आहे. परिसरातील नागरिकांचा आरोप आहे की, वेळोवेळी तक्रारी करूनही केवळ दिखाऊ कारवाया केल्या जातात किंवा अनेक प्रकरणांकडे दुर्लक्ष केले जाते. त्यामुळे या अवैध धंद्यामागे कोणाचे संरक्षण आहे का, अशी चर्चा परिसरात सुरू झाली आहे.
नागरिकांनी उपस्थित केलेले प्रश्न अधिक गंभीर आहेत—
गुटखाबंदी असताना विक्री इतक्या मोठ्या प्रमाणात कशी सुरू आहे?
संबंधित विभागांना याची माहिती नाही का?
तक्रारीनंतरही ठोस कारवाई का होत नाही?
अवैध विक्रेत्यांवर आणि पुरवठादारांवर कठोर कारवाई कधी होणार?
या प्रकरणात संबंधित अधिकाऱ्यांची जबाबदारी निश्चित केली जाणार का?
तरुण पिढी व्यसनाच्या विळख्यात
निर्मलनगर परिसरात शाळा, महाविद्यालये आणि दाट लोकवस्ती असल्याने या अवैध विक्रीचा थेट परिणाम तरुण पिढीवर होत असल्याची चिंता व्यक्त केली जात आहे. अल्पवयीन मुलांपर्यंत सहज पोहोचणारे गुटखा आणि तंबाखूजन्य पदार्थ भविष्यात गंभीर आरोग्यविषयक संकट निर्माण करू शकतात, असा इशारा नागरिकांनी दिला आहे.
संयुक्त धाडींची मागणी
स्थानिक नागरिक आणि सामाजिक कार्यकर्त्यांनी पोलीस प्रशासन, अन्न व औषध प्रशासन (FDA) आणि महानगरपालिका यांनी संयुक्त मोहीम राबवून अवैध गुटखा विक्रेत्यांवर कठोर कारवाई करावी, अशी मागणी केली आहे. तसेच या अवैध साखळीतील पुरवठादार, साठेबाज आणि संबंधित घटकांची सखोल चौकशी करून संपूर्ण रॅकेट उघड करावे, अशीही मागणी होत आहे.