पालघर | प्रतिनिधी
निवडणूक प्रक्रियेतील पारदर्शकता, मतदारांच्या अधिकारांचे संरक्षण आणि निवडणूक आयोगाच्या निष्पक्षतेबाबत प्रश्न उपस्थित करत पालघर जिल्हा काँग्रेस कमिटीच्या वतीने बुधवारी, ३० सप्टेंबर रोजी पालघर तहसीलदार कार्यालयाबाहेर तीव्र आंदोलन करण्यात आले. आंदोलनाचे नेतृत्व जिल्हा काँग्रेसचे अध्यक्ष कॅप्टन सत्यम ठाकूर यांनी केले.
आंदोलनादरम्यान कॅप्टन सत्यम ठाकूर यांनी चेहऱ्यावर मुखवटा घालून निषेध व्यक्त केला. “निष्पक्षतेच्या मुखवट्यामागे नेमके काय दडले आहे?” असा सवाल उपस्थित करत त्यांनी निवडणूक आयोगाच्या कार्यपद्धतीवर टीका केली. यावेळी मुख्य निवडणूक आयुक्त ज्ञानेश कुमार यांच्या प्रतीकात्मक पुतळ्याचे दहन करून निषेध नोंदवण्यात आला.
निवडणूक आयोगातील दोन आयुक्तांनी मतदार नोंदणी, मतदारांची नावे जोडणे-वगळणे, Form-6 मधील बदल तसेच मतदार यादीच्या डेटाबेसशी संबंधित काही निर्णयांवर आक्षेप नोंदवल्याचे वृत्त अलीकडे समोर आले आहे. या पार्श्वभूमीवर काँग्रेसने निवडणूक प्रक्रियेतील पारदर्शकता आणि निर्णयप्रक्रियेबाबत स्पष्टीकरणाची मागणी केली.
Form-6 संदर्भातील वादानंतर निवडणूक आयोगाने काही बदलांबाबत पुनर्विचाराची प्रक्रिया केली असून, २९ सप्टेंबरला काही ठिकाणी SIR-संबंधित अतिरिक्त घोषणा मागे घेण्याचा निर्णयही जाहीर झाला. आयोगाने मात्र निवडणूक प्रक्रियेशी संबंधित निर्णयांना कायदेशीर आधार असल्याचे आणि आयोगातील मतभेद हे संस्थात्मक चर्चेचा भाग असल्याचे स्पष्ट केले आहे.
दरम्यान, माजी केरळ मुख्य सचिव जिजी थॉमसन यांनी ज्ञानेश कुमार यांच्याबाबत केलेल्या राजकीय स्वरूपाच्या आरोपांचाही काँग्रेसने आंदोलनादरम्यान संदर्भ घेतला. थॉमसन यांनी २०१६ मध्ये कुमार यांनी त्यांना २०१९ लोकसभा निवडणुकीत भाजपच्या तिकिटावर निवडणूक लढवण्याबाबत विचारणा केल्याचा दावा केला आहे. हा दावा थॉमसन यांच्या कथनावर आधारित असून, त्यातून निवडणूक आयोगाच्या सध्याच्या कामकाजाबाबत कोणताही निष्कर्ष आपोआप सिद्ध होत नाही.
“आरोप खरे की खोटे, याचा निर्णय आम्ही देत नाही; मात्र भारताच्या मुख्य निवडणूक आयुक्तांबाबत असा गंभीर आरोप सार्वजनिक झाल्यानंतर त्यावर स्पष्ट उत्तर मिळणे हा जनतेचा अधिकार आहे,” अशी भूमिका कॅप्टन सत्यम ठाकूर यांनी मांडली.
“निवडणूक आयोग स्वतंत्र असला पाहिजे. त्याच्यावर कोणत्याही सत्तेचा राजकीय दबाव असता कामा नये. निवडणूक आयोग हा कोणत्याही एका पक्षाचा नसून संविधानाचा आणि प्रत्येक भारतीय मतदाराचा आहे,” असेही ठाकूर यांनी सांगितले.
विविध पक्ष व संघटनांच्या प्रतिनिधींची उपस्थिती
या आंदोलनाला किसान काँग्रेसचे महाराष्ट्र प्रदेशाध्यक्ष पराग पाष्टे, आदिवासी काँग्रेसचे माजी प्रदेशाध्यक्ष बलवंत गावित, महाराष्ट्र प्रदेश काँग्रेसचे प्रदेश सरचिटणीस योगेश नाम, प्रदेश काँग्रेसचे प्रवक्ते अविनाश राऊत यांच्यासह बहुजन विकास आघाडीचे नेते प्रशांत पाटील, वाधवण युवा संघर्ष समितीचे अध्यक्ष मिलिंद राऊत तसेच शिवसेनेचे नगरसेवक उपस्थित होते. शिवसेना बाळासाहेब ठाकरे यांचे नगरसेवक आरिफ कलाडिया उपस्थित होते
याशिवाय पालघर जिल्ह्यातील विविध तालुकाध्यक्ष, शहराध्यक्ष, महिला काँग्रेसच्या पदाधिकारी, काँग्रेसच्या विविध सेलचे अध्यक्ष व पदाधिकारी आणि मोठ्या संख्येने कार्यकर्ते आंदोलनात सहभागी झाले.
काँग्रेसच्या म्हणण्यानुसार, अनेक तरुण नागरिकांनीही आंदोलनस्थळी उपस्थित राहून मतदारांच्या अधिकारांच्या संरक्षणाच्या मागणीला पाठिंबा दिला.
संविधानिक संस्थांच्या स्वायत्ततेसाठी संघर्ष सुरूच ठेवण्याचा निर्धार
निवडणूक प्रक्रियेतील पारदर्शकता, संविधानिक संस्थांची स्वायत्तता आणि मतदारांच्या अधिकारांच्या संरक्षणासाठी लोकशाही मार्गाने संघर्ष सुरूच ठेवण्याचा निर्धार पालघर जिल्हा काँग्रेसने यावेळी व्यक्त केला.
“लोकशाहीत मतदाराचा आवाज सर्वांत मोठा आहे. मतदारांच्या अधिकारांशी कोणतीही तडजोड आम्ही सहन करणार नाही,” असा निर्धार आंदोलनकर्त्यांनी व्यक्त केला.