मनोर-विक्रमगड मार्गावर पिकअप जीप पकडली; ९ लाख ८१ हजारांचा मुद्देमाल जप्त, एकाला अटक
पालघर | प्रतिनिधी
पालघर जिल्ह्यात अवैध धंद्यांविरोधात पोलिसांनी कारवाईचा धडाका सुरू ठेवला असून, दमण बनावटीच्या दारूची अवैधरित्या वाहतूक करणाऱ्या एका आरोपीला स्थानिक गुन्हे अन्वेषण शाखेने अटक केली आहे. मनोर-विक्रमगड मार्गावरील जव्हार फाटा येथे करण्यात आलेल्या या कारवाईत दमण बनावटीच्या दारूचा साठा आणि वाहतुकीसाठी वापरण्यात आलेली पिकअप जीप असा एकूण ९ लाख ८१ हजार ८८ रुपये किमतीचा मुद्देमाल जप्त करण्यात आला आहे.
पालघर जिल्ह्याचे पोलीस अधीक्षक यतिश देशमुख यांनी जिल्ह्यातील अवैध धंद्यांविरोधात कठोर कारवाई करण्याच्या सूचना सर्व पोलीस अधिकारी आणि कर्मचाऱ्यांना दिल्या आहेत. त्यानुसार स्थानिक गुन्हे अन्वेषण शाखेचे पथक २८ ऑक्टोबर २०२६ रोजी मनोर पोलीस ठाण्याच्या हद्दीत गुन्हे प्रतिबंधक गस्त घालत असताना त्यांना दमण बनावटीच्या दारूची वाहतूक होत असल्याची गोपनीय माहिती मिळाली.
या माहितीनुसार मनोर-विक्रमगड मार्गावरील जव्हार फाटा येथे पोलिसांनी नाकाबंदी केली. यावेळी संशयित पिकअप जीप येताना दिसली. पोलिसांनी वाहन थांबवून तपासणी केली असता त्यामध्ये विविध प्रकारच्या दमण बनावटीच्या दारूचे बॉक्स आढळून आले. या दारूची किंमत २ लाख ८१ हजार ८८ रुपये असल्याचे सांगण्यात आले.
या प्रकरणी पोलिसांनी वाहनचालक याला ताब्यात घेऊन अटक केली. दारूच्या साठ्यासह वाहतुकीसाठी वापरण्यात आलेली पिकअप जीप जप्त करण्यात आली. वाहनाची किंमत आणि दारूचा साठा मिळून जप्त मुद्देमालाची एकूण किंमत ९ लाख ८१ हजार ८८ रुपये आहे.
याप्रकरणी मनोर पोलीस ठाण्यात अंतर्गत गुन्हा दाखल करण्यात आला आहे. या गुन्ह्याचा पुढील तपास सहायक पोलीस निरीक्षक रत्नदीप साळोखे करीत आहेत.
ही कारवाई पोलीस अधीक्षक यतिश देशमुख आणि अपर पोलीस अधीक्षक विनायक नरळे यांच्या मार्गदर्शनाखाली स्थानिक गुन्हे अन्वेषण शाखेचे प्रभारी अधिकारी पोलीस निरीक्षक प्रदीप पाटील, पोलीस उपनिरीक्षक स्वप्नील सावंतदेसाई आणि त्यांच्या पथकाने केली.
अवैध दारू वाहतुकीविरोधात पालघर पोलिसांनी केलेल्या या कारवाईमुळे जिल्ह्यातील अवैध धंदे करणाऱ्यांना स्पष्ट इशारा मिळाला असून, अशा प्रकारच्या गैरकृत्यांविरोधात कारवाई सुरूच राहणार असल्याचे पोलिसांच्या भूमिकेतून स्पष्ट होत आहे.
