मुंबई प्रतिनिधी: – प्रीती गडा
मुंबई, खार (पूर्व) :
जवाहर नगर रोड, खार (पूर्व), मुंबई–५१ येथे वाहतूक कोंडी आणि अनधिकृत पार्किंगमुळे नागरिकांना होत असलेल्या त्रासावर नियंत्रण मिळवण्यासाठी ट्राफिक पोलीस व निर्मल नगर पोलीस स्टेशनच्या संयुक्त मदतीने धडक कारवाई करण्यात आली. या कारवाईमुळे परिसरातील वाहतूक सुरळीत होऊन नागरिकांना दिलासा मिळाला आहे.
जवाहर नगर रोडवर अनेक दिवसांपासून दुचाकी, रिक्षा व चारचाकी वाहनांचे अनधिकृत पार्किंग, रस्त्याच्या कडेला अडथळे आणि अतिक्रमणामुळे वाहतूक कोंडीची समस्या निर्माण होत होती. यामुळे पादचाऱ्यांना चालणे कठीण होत होते तसेच आपत्कालीन वाहनांनाही मार्ग काढणे अवघड जात होते. ही बाब लक्षात घेऊन ट्राफिक पोलीस व निर्मल नगर पोलीस स्टेशनने संयुक्तरित्या कारवाईचे नियोजन केले.
कारवाईदरम्यान रस्त्याच्या कडेला बेशिस्तपणे उभ्या केलेल्या दुचाकी व इतर वाहनांवर कारवाई करण्यात आली. काही वाहने क्रेनच्या साहाय्याने उचलण्यात आली, तर नियमभंग करणाऱ्या वाहनचालकांवर दंडात्मक कारवाईही करण्यात आली. तसेच दुकाने व फूटपाथवर होणारे अतिक्रमण हटवून रस्ता मोकळा करण्यात आला.
या मोहिमेमुळे जवाहर नगर रोडवरील वाहतूक व्यवस्था पूर्ववत झाली असून वाहतूक कोंडी कमी झाली आहे. स्थानिक नागरिकांनी आणि वाहनचालकांनी या कारवाईचे स्वागत केले असून अशा प्रकारची कारवाई नियमितपणे करण्यात यावी, अशी मागणी केली आहे.
ट्राफिक पोलिसांनी नागरिकांना आवाहन केले आहे की, वाहतूक नियमांचे पालन करावे, अनधिकृत पार्किंग टाळावे आणि रस्त्यांवर अडथळे निर्माण होणार नाहीत याची काळजी घ्यावी. नियमांचे पालन केल्यासच परिसरातील वाहतूक सुरळीत आणि सुरक्षित राहील, असेही त्यांनी स्पष्ट केले.